Rom 11 | DOB | STEP | Ta mwa'adega, ona'ai'aila Yaubada 'ina tomotaiyao me Isileli 'ie'idi'idiyediya? Nigeya! Manuna 'abo'agu 'ebweu goma Isileli susu Beniamina 'enega, ta 'ima susu sinabwana 'ana esana Ebelaamo.

Romans 11

Me Isileli pu'epu'edimo sida miya bobo'ana

1 Ta mwa'adega, ona'ai'aila Yaubada 'ina tomotaiyao me Isileli 'ie'idi'idiyediya? Nigeya! Manuna 'abo'agu 'ebweu goma Isileli susu Beniamina 'enega, ta 'ima susu sinabwana 'ana esana Ebelaamo. 2 'Enega yamwalatonina 'aene 'abo'ama Yaubada 'ina tomotaiyao nima 'igimi esinuwema be 'ina bodao, 'enega geya'abo 'ie'idi'idiyema. Lowaenei Ilaitiya me Isileli 'ilomugiyedi Yaubada 'ena, ta 'ina ona nina Buki Tabu 'ena 'igwae, 3 “'Inapwana, ni'atu 'imu palopitao maibo'adi siloemwawasidi ga wate 'imu 'ebe taliya sigie to'umaliyena, ga 'abo'agu namo gete yatupwa, ta gete tuga wate nuwanuwadi be 'aene sida loemwawasigu.”

4 Ga Yaubada 'igwae, “Nigeya 'aene tebweuyo 'umiyami, ta esi 'igu bodao site sebeni tausani wate simiyami, taudi Baala 'enega yaabodebodedi, ga nigeya 'ena sida bwagobwago.”

5 Wate nadigega gete tuga Yaubada ni'atu 'ina bodao me Yudia mamo pu'epu'ema 'ina obobomega 'iesinuwema, be 'abo'ama gete 'atupwa ga 'amiyami. 6 'Etoseyana gete 'alobena nigeya 'aene 'ima guinuwao 'ediyega, ta esi Yaubada 'ina oboboma 'enega, manuna 'abo oboboma ma 'ana e'isa nate nigeya oboboma 'ai'aila. 7 Gete 'alena 'enega me Isileli maibo'adi 'etoseyana nina si'ebesa yogenena, ta esi 'abo'ama pu'epu'emamo Yaubada 'ina bodao esiesinuwama 'etoseyana nina 'alobena, manuna me Isileli nidi maibo'adi debadeba pa'alidi, ga nigeya silobaloba.

8 Ga Buki Tabu wate nadigega 'isimana, 'igwae,

“Lowaenei ga batuwa Yaubada 'igie nuwaowanedi, 'enega matadi 'igiekebodi ta wate tenadi 'igietunidi.

9 Ga Debida wate nadigega 'ina simana 'igwae,

“'Ilobwenedi be 'idi sagaliyao 'ediya 'adi loina sida loba,

be nadigega sikwa 'ediyega si'onadi,

ta wate 'atuwa sa'e 'ediya sibebe'u.

10 Ta wate 'ilobwenedi be sida mata kebokebo be geya'abo to'ase si'ita'ita,

ta wate tuta yauna 'adi 'aa'aala 'ediyega gwaudi sida kopu ataya.”

Taudi nigeya me Yudia 'adi 'etoseyana manuna

11 'Enega taudi me Yudia nidi siesetupedi, mwa'adega 'adi loina? 'Aene ni'atu sibe'u ataya be geya'abo sitoolo limana, aga? Nigeya! Ma'etamo sida toololimana. 'Enega wada nuwa'i'isi 'aene 'omi nigeya me Yudia 'etoseyana walobena be me Isileli nidi sida e'ipi'ipiyemi. 12 Ta 'omi nigeya me Yudia 'etoseyana bobo'ana walobena manuna taudi me Yudia ni'atu sibe'u, ta esi 'eguma sitoolo limana nate 'ebe gwausowala sinabwana maibo'ada 'edaya.

13 'Igu ona gete 'omi nigeya me Yudia manumi. Manuna 'abo'agu Yesu Keliso 'ebweu 'ana tosimana sena apwesa 'ediya ta 'igu paisewa gete manuna yaonatu'e, 14 be 'enega me Yudia, 'omi nigeya me Yudia sida e'ipi'ipiyemi, be 'idi e'ipi'ipi nina 'enega 'ida giesana iledi, be 'etoseyana siloba Yaubada 'enega. 15 Ta ona'ai'aila, Yaubada me Yudia 'iguitoyasedi be 'aene 'omi nigeya me Yudia Yaubada 'iegosigosiyanemi, be 'enega to tuta 'ena 'abo me Yudia nidi sisanaila, yage bobo'ana 'ida apwesa, be 'ana 'ita 'atuwa nadigega taudi mwawasega sitoolo limana.

16 Ta tubudina Ebelaamo, tauna Yaubada 'ina tai, 'enega taudi wate Yaubada 'ina tomotaiyao. 'Enega 'ebe'ita gete 'ebweu yada 'ebwa'emi: 'Abo mweya wa'ita be bobo'ana, nate ni'atu wasinapuna 'aene ma'etamo sesoi bobo'ana. Nadigega wate 'abo kaiwe 'alena wa'ita bobo'ana, ni'atu wasinapuna 'aene nalinao wate bobo'adi, 17 ga taudi me Yudia nidi 'atuwa nadigega Yaubada 'ina kaiwe, manuna nalinao 'aidi 'ilasedi ga 'omi 'emiyega 'ielopa'eludiya, manuna 'omi mali kaiwe nalinao ta esi 'i'ewemi ga 'ina kaiwe 'ena 'itubwemi, 'enega 'ina kaiwe nina 'ana bwasiyega wanumanuma, nate Yaubada 'ina oboboma tuta yauna walobaloba. 18 Ta esi oboboma nina 'emiya geya'abo manuna wanuwanuwatu'e, manuna nali nigeya sawesawenaya be 'ale 'iloine, ta esi 'ale 'ilobwenena be nali 'iloinedi.

19 Manuna 'abo wanuwatu'e be wagwae, “Yaubada 'ina kaiwe nalinao ni'atu 'ilasedi ga 'abo'ama 'emega 'ilopa'eludi. 20 Nate ona'ai'aila. Ta esi wada nuwa'i'isi 'aene naliyao nidi 'ilasedi, manuna nigeya siemiemise, ta esi 'omi 'imi emisa 'enega yawasimi bobo'ana walobena. 'Enega 'ilobwenemi be Yaubada wada mataute ta geya'abo wanuwanuwatu'e, 21 'abona nai Yaubada 'ina kaiwe nali 'ai'ailinao ni'atu 'ilasedi 'ediyega 'omi 'ida elopa'eluyemi, ta wate 'omi 'ida lasa yaulemi.

22 E'ita gete 'ie'iteda 'aene Yaubada 'ina oboboma be 'ina loina pa'alina ta'italobena, manuna tobe'u 'ediya loina pa'alina 'isa'udi, ta esi 'omi 'iobobomemi, ta 'abo 'ina oboboma waebesinei, 'omi wate 'ida lasa yaulemi. 23 Ta 'abo me Yudia nidi sinuwa'ebuni be siemisa lima, 'iabe Yaubada 'ida tubwelimadi, manuna Yaubada sawesawenaya be nadigega 'ida guinuwa. 24 Ta 'omi nigeya me Yudia wada nuwa'i'isi 'aene lowa 'omi mali kaiwe nalinao, ga nigeya Yaubada 'ina kaiwe nalinao 'ena wamiyami, ta esi 'ina guinuwa 'ebe nuwaowana sinabwana 'emiya 'iguinuwena, manuna 'ina kaiwe 'ena 'itubwemi, 'enega me Yudia nidi, taudi Yaubada 'ina kaiwe nali 'ai'ailinao, nadigega Yaubada sawesawenaya be 'itubwe limadi 'ina kaiwe nina 'enaya.

Me Isileli 'adi 'etoseyana

25 Gosegwao, nuwanuwagu be 'ebweu yage kwaikwaiyina me Isileli manudi yada simana apwese 'emiya be 'aene geya'abo wanuwanuwatu'e, ta esi yage gete wada mwalamwalatoni 'aene ma'etamo me Isileli ma idi debapa'ala sida miyami 'ana laba 'omi nigeya me Yudia esiesinuwami maibo'ami 'etoseyana wa'ewa, 26 be 'enega me Isileli maibo'adi 'etoseyana siloba. Manuna Buki Tabu 'ena 'isimana 'igwae,

“To'etoseyana nina goma Sayoni 'ida apwesa be Yekobe 'ina susuyao 'idi to'umalina 'ediyega 'ida 'ewayaule. 27 Be tuta nina 'abo 'idi to'umalina ya'ewayaule, 'iabe onaupaupa bobo'ana ya'ebwa'edi.”

28 Ta ona'ai'aila, gete tuga me Yudia Yaubada sietalauwalena, manuna 'ina tetela bobo'ana siguitoyasena, 'enega 'omi nigeya me Yudia 'etoseyana walobena, ta esi wada nuwa'i'isi 'aene me Isileli nidi Yaubada 'iobobomedi, manuna lowaenei tubudiyao Yaubada 'iesinuwedi 'aene 'ina bodao, 29 'enega nigeya sawesawenaya be 'ina bubuna be 'ina esinuwa, nai 'ina oboboma 'ediyega 'isa'ugelasa. 30 Ta 'omi nigeya me Yudia lowa Yaubada nigeya wamulimuliyena, ta gete tuga Yaubada 'ina 'atenuwa'ole'ole walobena, manuna me Isileli Yaubada siguitoyasena. 31 Wate nadigega taudi ma'etamo Yaubada 'ina 'atenuwa'ole'ole sida loba, nadigega 'omi tuta gete walobena, 32 manuna tologwautoyasa maibo'ada gete nadigega Yaubada 'ibubuna'eseda be 'aene 'ina 'atenuwa'ole'ole 'ida e'itada.

33 Yaubada 'ina loina be 'ina mwalatoi sinabwa wawasae manudi geya'abo tagwaegwae, ta 'abo'ada nigeya 'ebweu yaita sawesawenaya be Yaubada 'ina nuwanuwa be 'ina guinuwao 'isinapudi. 34 Ona'ai'aila, 'ina mwalatoi sinabwa wawasae, 'enega nigeya sawesawedaya be taatao be 'aene tae'ita 'enaya 'ebweu to yage nai manuna. 35 Ta wate nigeya sawesawedaya be 'ana lowaga tasa'u be 'aene 'edaya 'ida yotula limana. 36 Manuna tauna yage maibo'ana 'adi tobubu, ga tauna wate 'ina waiwaiyega yage maibo'ana tauna manuna 'ibubudi. 'Enega Yaubada nina tada tupu atae. Eimeni.